خرجت برّا السجن
وسألتهم عنها
مين خد حبيبتي سبيّة من أرضي؟!
ردت وجوههم بالخجل والعار
كل البلاد في الأمة مملوكة
مسفوك دماها بعلة استعمار
فحلفت يبقى لقاكي ديني ياحبيبتي
دوَّرت عنك في التاريخ ابحث عن الجاني
طوفت البلاد اصرخ بعلو الصوت
رد التاريخ قام قالي أوطاني
هيا السبب
بتدنس المعبود
وتقدس العربيد
دم الحسن ماراح هدر
دم الحسن ف إيدين يزيد
مايموتش أبداً بالسنين الدم
نام ياحُسين واحضن اخوك ماتخافش
دي عروقي لسه بيجري فيها السِم
قتلوا القتيل واتمشوا في جنازته
بيعزوا جنب بجنب
مين اللي باقي ياناس من آل البيت
معاوية قالي ترامب
قتل الرجال النشامة وهجّر الباقي
صبحت عِراقنا عَراء
لسه يابلقيس دمك الحاني فـ رقابنا
حامية دموعك يانزار على كربلاء
إرسم حدودك ياعليّ ولِمّ العيال
مات الرسول ولا سابش للغلمان إمام
عنب اليمن عملوه نبيت للإنجليز
بالغصب سِكرت جاريات الشام
مستني إيه من أمة بتحزِّم جواريها
بمشنقة صدام
اللي فَتَلها الأمريكان
لفيت بلاد الأمة اناديها
رحال تاخدني مدينة لمدينة
هل ياترى بتضحك حبيبتي هناك فـِ دجلة
يااهل الفرات شوفتوش حزينة؟!!
الأرض حرب
غربة
وجوَّها أغرب
أحدث سلاح فـ بلادي هو الجُبن
فمن الطبيعي انفد بجلدي اهرب
وانا يعني مين؟
دي البصرة عاجزة تلبّي يافلسطين
وانا ما احترفش الحرب ولا فارس
واقوى انتصار في حياتي في الدواوين
خطّيت على بلاد الحجاز انده
يا أهل مكة حبيبتي راحت فين
بصيت لقيتهم وافقوا ع البيعة
لاجل ان يوم الكعبة ماتتهد
كان لازم ارضى بحكم م الشيعة
هاقدر ساعتها أطوف وانادي اِلله
لفيت سبع لفات ومالقتهاش
مش قالوا برضوا اللي حاميها اَلله
شيلوا الصليب من أورشليم القدس
حطوا الرايات البيضة يانصارى
من بعد مريم يامسيح الأمريكان ماسابوش عذارى
ياخير أمة في واشنطن
أما احنا أمة بالاستعارة
ياخير أمة في واشنطن
شوفتوش حبيبي مع البكارى؟؟
دا يدوب سنة في السجن واما خرجت جف النفط واول ماجف النفط صدرنا الدعارة
أرَّخ ياشعر وقولهم هيهات
تبت يداي ان خوفت مِ الجايات
لاكتب تاريخكم ياعرب بالناي
ويا ويلكوا لوم الشعر بالنايات
يارب فين؟!
حبيبتي فين؟!
مابقتش عارف روحي إيه هيَّ
الدنيا رايحة ولا هي جاية ؟!!
ماعرفش غير ان النبي عربي
فازاي لكل اعرابي جنسية؟
يانآئلة عودي بقميصك وادفني عثمان
ماخلاص ماعادش لجثته ديّه
عن إبن هتلر َرضيَ عليه الألمان
قال لن تموت الفكرة نازية
وهييجي بكرا فاشيست للعربان
ياخد أتاوة لكل حرية
والعالم الغربي الجبان جمع معاه كل الطغاه والتورتة كنتي انتي
أول قصيدة حزن عربية
يابلاد ماعادت تسوى تعريفة
على أرض مصر المذهب الشافعي
وقت الجواز على دين ابو حنيفة
بيتنا الإزاز أهله معاهم طوب
شاطرين في حدف الطوب وحريفة
مابننتَهجش غير الشجب ول اعتراض
واساتذة في التنديد
يوماتي اموت م العار ياأوطاني
وبتولديني فـ كل فجر جديد
طلبت مرة اصبح أنا جيشك
نمت وصحيت فلقيت في إيدي حديد
دلوقت أسدِ العرب
أصبح ذليل الدُب
يقطع النت اللي خلى عنترة ينشغل
فَعبلة تعرض نفسها للحُب
وآهي دي الحقيقة وشعبنا معيوب
شاهد ياخويا قبل مانحذفه
فيديو بيجمع عبلة مع شيبوب
وآهي دي الحقيقة وشعبنا معيوب
مافهمش معنى الخطة ولا مَرَّة
لما انشغلنا بالنياج الحُمر
القدس صبحت حامل الجرَّة
باينّي عايش من زمن ياما
قبل اما تبقى لُغتنا عبرية
قبل اما تبقى القصة كان ياما كان
كان فيه زمان أمة عربية
أنا وسط حرب وعقبة مش نافع
وازاي جيوشه تجابه النووي
سيدنا النبي دلوقتي مش شافع
يحمي المدينة ومسجدُه النبوي
ولا عاد رجال تحفر هنا أخدود
دم الخيانة من جدود لجدود
مش أي صالح للوطن يصلح
ولا أي صالح يبقى من مواليد ثمود
تعليقات
إرسال تعليق
أترك تعليق