من غرائب المصريين انك اول ماتقوله المروحة دي في أمريكا ب ٦٠ دولار..يمسك الألة الحاسبة ويضرب ٦٠في ١٨.. وكان زمان مش زمان جدا يعني من ٨ سنوات تقريبا كان يضرب ٦٠ في ٧..وفي الحالتين أصبح مافيش فرق بين سعرها هنا وفي بلاد العم سام.. مش صح كده..؟!.. لا طبعا ده تفكير "بطيخ" طبعا واتعودنا عليه واتربينا عليه.. عارف ليه.. علشان طول عمرنا نفضل فاكرين ان مصر أرخص دولة في العالم.. وهم.. وهم بنصدقه وندافع عنه كمان..
طيب هتقولي ليه بتقول "بطيخ"..؟.. اقولك.. اولا الدولار في أمريكا زي الجنية في مصر.. يعني عملة الدولة زي عملة دولتك.. والريال زي الجنية والدرهم زي الجنية.. وثانيا دخل الفرد في أمريكا كحد أدنى يعني الضايع بيقبض كام؟.. اقولك الحد الأدنى يعني الحضيض بيبدأ ب ١٥ دولار في الساعة.. يعني اللي بيشتغل ٨ ساعات بيقبض ١٢٠ دولار في اليوم.. امسك الان الألة الحاسبة وقولي ده عندك يعادل ايه... يعادل راتب موظف محترم في الشهر.. عرفت انه جنية..
يعني حضرتك لما يضحك عليك المطبلاتية اللي بيقبضوا ملايين ويقولك كيلو الكوسة في أمريكا ب٦دولار.. الكوسة ب ٩٠ جنية.. احمدوا ربنا يا مصريين.. ساعتها حاجة من الاثنين اما المشاهد الطيب هيهز ودانه ويقول احنا في نعمة.. أو المشاهد المحترم المثقف هيموت من الضحك ولو بيتفرج لوحده مؤكد هيقول كام كلمة كده تعبيرا عن الموقف قبل مايرمي التليفزيون اقصد الشاشة اللي عليها المطبلاتي بأقرب "نعل" جنبه..لان كده الكوسة ب ٦ جنية وحضرتك باقبض في الشهر ما لايقل عن ٣٠٠٠ دولار يعني بالاله الحاسبة مبلغ خيالي..هي دي الحقيقة اللي لايمكن انسان عاقل ناضج عنده ضمير وعلم يخرج على الشاشة ويقولها..حتي لو سمحوا له أن يقولها ويفهم الناس اللي بتهز و دانها مش هتصدقه ويكون عدو الدولة وعميل وبتاع أجندات.. احنا عايشين بالوهم وبس.. غير كده كله مرفوض..
طولت عليك، لكن كان لازم نقول نظرية"البطيخ" دي قبل مانشرح نظرية "البرسيم" طبعا هتقولي هو فيه نظرية اسمها نظرية البرسيم؟ اقولك : أيوه النظرية دي بالتحديد متصدرة حياتنا وتقريبا في مختلف المجالات.. فاكر لما صفقوا للعالم الجليل اللي عالج كل الامراض بصابع كفته وقالك اكتر من دولة فشلت في اختطافه وتجنيده ودفع مليارات ل"سياته".. ماهو كانوا ملبسينه بدلة لواء.. دي مثلا نظرية البرسيم بس بشكل مختلف عن كلامنا في الاقتصاد لأنها كانت في الطب.. طيب النظرية اللي عندنا بتقول ايه.. بتقولك هو الشئ لما يعوم بيحصله ايه.. بيطفو على سطح المية.. عندك شك في العلم؟!.. طيب العلم عندنا بيقول ايه، بيقول اللي بيغرق هو اللي بيعوم.. مش مصدق.. مش باقولك برسيم.. عمرك ماسمعتهم بيقولك تعويم الجنية وهو كل مرة بيتنفس من تحت الماء ونازل للقاع بسرعة..احنا بنعوم الدولار وبيتدلع على وش المية.. بس عيب نقول كده على غرار العلاج بالكفتة.. طيب من ٦ سنوات لما حصلت المعجزة وعومنا الجنية بأكبر مايوه لبسه في حياته وصلناه من ٧ جنية ل ١٩و ٢٠ جنية مرة واحدة.. يعني أقل من ٣ أضعاف بقليل تقريبا.. انا اسف طولت عليك بس حد قالك ده معناه ايه.. اقولك.. معناه ان حضرتك ساعتها لو في جيبك عشرة جنية بقت بقدرة قادر ٦ جنية في لحظة..شفت التعويم.. يعني مرتبك لو بالمصري المتعوس هيقل مش اقل من ٤٠ في المئة في الحال..يعني تم تأميم ٤٠ في المئة من دخلك.. مش بس كده.. طبعا الجرجير زعل وأخذ على خاطره ساعتها وتضاعف ٣ مرات.. يعني ال ٦٠ في المئة الباقيين لحضرتك بعد ما المحروس عوموه أصبحت مش ٦٠ في المئة.. فهمت حاجة.. لو مافهمتش يبقى نروح على اللي بعده..
تخيل فيه واحد سائح في جيبه دولارات شرف المحروسة ساعتها.. سبحان الله كان في جيبه ١٠٠ دولار يعني ٧٠٠ جنية.. أصبحوا ١٩٠٠ جنية.. يعني يتغنغ من أرباح عمره ماحققها في بلده.. طيب سيبك من السائح وخليك مع الناس اللي بتقبض بالدولار.. الناس دي عامت وهيصت بجنون.. وعندك كمان اللي عنده تحويشة العمر بالدولار.. صحي الصبح وجد نفسه مليونير.. ساعتها واحد صديقي عنده مطعم على قد الحال في هولندا.. عاوز يشتري شقة في مدينة نصر..عثرنا على شقة لقطة بمليون جنية.. ياه مليون جنية.. ايوه ايه يعني لأنه قالي ساعتها هحول ٢٢٠ الف دولار لشقيقه ويسجل الشقة.. والمبلغ ده طبعا شغل شهرين ثلاثة هناك لما الكبدة تكون رايجة..
باختصار..قرار التغريق بيعوم اللي معاه أخضر ويغرق اللي معاه جنية مأسوف على شبابه..دي نظرية "البرسيم" سريعا.. ناهيك عن تخريب الاقتصاد والتضخم ومجموعة أمور في علم الاقتصاد مش علم الكفتة..
والبقاء لله.. كان بخمسة دولار.. أصبح "آوفه" منه ب٦دولار..
تعليقات
إرسال تعليق
أترك تعليق