زي ما هيَّ.. هيَّ
...
هيَّ.. مش هيَّ الحكومة
مش محافظين أو عُمد
مش رئاسة وبرلمان
مصر لسّه فيها "ثومة"
تخطف الناس بالحنان
لسه فاكر؟ بس ماتقوليش زمان
........
فيها كاريوكا بدلعها
سندريلّا مين سمعها
واسماعين ياسين ببّقُه
طيبة وشويّة جنان
........
مصر لسّه: هند رستم
شادية رشدي أباظة فاتن
المليجي وماجدة مظهر
فيها شيعة وسُنّة.. أزهر
الرحاب واسطبل عنتر
فيها ناس بتحب غيبًا
فيها ناس ماتقولش عيبًا فيها واتحداك بقلبي
فيها مارمينا العجايبي
اللي خد أكاليل تلاتة لا تزول ولا حتى تفنى
والحسين يفرش حصيرتُه
للي حب يجيب في سيرتُه
واللي قال: شي الله يا سيدنا
مصر: سنباطي وحامولي
كتفها حامل حمولي
لسّه ناصر سد عالي
روح حنونة ونيل نجاشي
.......
هىَّ أم الدنيا.. صدَّق أو فارقها
شابَّة يافعة
كريمة أفعى
تلف على رقبة خانقها
أو تدفِّي اللي يصونها بالبشاشة
مصر بلِّة ريق عطاشى
الولاد آخر رجولة
والبنات زي البُغاشة
........
في الزجل إنده تلاقي الأسطى بيرم
زي ترزي بجلابية
“حداد” يقول للشعر قوم أقعد مكانك
واحنا نضحك م الأسية
وشيخنا سيد عجن حلمها مواويل
في السكرية نجيب بيكتب ثرثرة ع النيل
ويحيى حقي يا ام هاشم قاد لك القنديل
وبليغ يحفَّظ حليم حبَّة من حنيَّة
وكل ما ابعد عنّهم شوقي يندهلي
مصر كل ما الف فيها
أتكسف من جهلي
الزمالك نِفسه فيها يبقى أهلي
كل شيء فيها ببساطة
شكله عادى.. عادى.. عادى
آدي عربية بطاطا
تحت أبراج المعادي
........
مصر نار ساعات وميَّة
بس زي ما هيَّ هيَّ
وهوَّه ده دستورها يا ابني
صوت بيهتف إيد بتبني
جرح واحد
فرح واحد
شرعها في الإنسانية
مش باقولك:
مصر زي ما هيَّ.. هيَّ
تعليقات
إرسال تعليق
أترك تعليق