محمد علام يكتب : خطورة الضربة الأمريكية

 ليه الضربة الأمريكية على المواقع النووية الإيرانية خطيرة جدًا، ويمكن أخطر حدث حصل في المنطقة من ساعة بداية حرب غزة؟

هل السبب هو ان المفاعلات والمواقع النووية دي هتسرب إشعاعات؟

لأ خالص.. الحقيقة يا صديقي ان تسريب المواد النووية من المواقع دي صعب وحتى لو حصل مش هيكون ذو تأثير كبير لإنهم أصلًا مواقع محصنة جوه الجبال.. ومفيش غير مفاعل نووي واحد بس في ايران هو اللي لو اتضرب هيسبب كارثة بيئية أخطر من تشيرنوبل.. المفاعل ده هو مفاعل بوشهر، وقصفه هيسبب سحابة مشعة هتقضي على امكانية الحياة في مدن الخليج، وهسيبلك صورة في أول كومنت توريك تأثير السحابة بتاعته هيوصل لفين حسب محاكاة اتعملت عليه من قريب.. لكن مفاعل بوشهر متضربش.. ومش هيتضرب. 

ليه؟

عشان هو مفاعل سلمي، مالوش اي علاقة ببرنامج إيران النووي.. وكمان مستحيل ترامب أو اسرائيل يضربوه عشان ده معناه ضرر مباشر للخليج، وده مستحيل يحصل.. ف احنا ف أمان من الإشعاعات النووية متقلقوش...

لكن الخطر الحقيقي بقى ف ايه؟!

 الخطر الحقيقي هو في التأثير الاستراتيجي والسياسي للضربة..

إيران كانت بتهدد من ساعة بداية الحرب ان تدخل أمريكا هيكون الرد عليه هو قصف المواقع العسكرية والقواعد الأمريكية في الخليج كله وتدميرها، وكمان لوحوا باستعمال ورقة مضيق هرمز، وانهم هيقفلوا الملاحة فيه بالكامل ويزرعوا فيه ألغام... وده لو حصل، فهو هيجر المنطقة كلها لحرب لا يمكن توقع نتائجها ولا تخيل أحداثها حتى.. خصوصًا مع امكانية تدخل حلفاء إيران زي الصين وروسيا في الموضوع..

 طب هل إيران هتعمل كده؟!

الله أعلم.. النظام الإيراني دلوقتي خسر هيبته واتضربتله المواقع بتاعته اللي كان بيفتخر بيها ويهدد كل اللي يقربلها.. وبرغم انهم بيقولوا انهم نقلوا المواد النووية اللي كانت جواها لحتة تانية، وان برنامجهم النووي مش هيقف، بس انا وانت عارفين ان الضربة دي اهانة.. وإهانة كبيرة اوي.. وبرنامجهم النووي كده فعلا وقف خلاص ومش هيقدروا يرجعوه قبل سنين بدون مبالغة..

لو النظام الإيراني اختار انه مينفذش تهديده، ف دي هتبقى نهايته سياسيًا وهيكون وقع وثيقة سقوطه بنفسه، والبديل الوحيد هو قصف امريكا واسرائيل بنفس الشدة واشعال المنطقة لإنقاذ نفسه..

يا ترى هما هيختاروا ايه؟! 

الله أعلم انا مقدرش اقولك.. بس هنشوف في الساعات اللي جاية..

 وفي النهاية مهم أوي أوجه الكلام ده لبعض الزملاء المحترمين اللي بينزلوا بوستات فيها تلقيح على اللي بكتبه، لمجرد انهم مش متقبلين طريقة سردي للأحداث.. عايز أقول عيب وإسلكوا عشان شكلكم بقى وحش، عشان مفيش حاجة من أول الصراع ده قلتها كانت غلط، ولا في حاجة توقعتها محصلتش.. ف يا ريت يكون في شوية احترام متبادل حفاظًا على ما تبقى من ود ما بيننا... وهما عارفين نفسهم كويس.