يمكن يناير تبقي مزعلة حضرتك ..يمكن بتفكرك بأيام صعبة ..يمكن مش بتحبها ..موضوع سيادتك ...
بس انا بحبها
يناير بالنسبة لي مش عجل هنعبده ..ولا استحقاق لأصحابها ..ولا عنوان للفوضي ....لا
يناير بالنسبة لي ، عنوان لقرار ناس بالتغيير ...قرار ناس أنها عاوزة تعيش ..تعيش بكرامة ...
يناير كانت اعلان إن الناس تقدر ..وده يمكن يزعل المستبد ..
اعلان الناس من حقها تغير ..وده برده يزعل المستبد اللي بيفضل يحكمنا بإنتخابات صورية لحد اخر نفس فيه ....
يناير كان اعلان عن إمكانية حكم الناس لأنفسهم من خارج دائرة التوريث ..فنحن لم نعرف الا التوريث ..فالأمر ليس توريث اب لابنه فقط ..لكنه توريث كل حاكم لمن بعده ..المهم أن يحافظ علي انتقاله داخل نفس الدائرة .
يمكن تزعل حضرتك ..بس هي اجمل وأشرف ايام بلدنا ..ناس قررت انها تضحي بحياتها عشان غيرهم يعيشوا حلم حكم الشعب لنفسه ..
حلم ...لأول مرة يملك الشعب حق اختيار الحاكم ، محاسبته ، عزله واختيار غيره ..
"حلم أن نعرف لاول مرة حكم رشيد ، تداول سلمي للسلطة وان نري رئيس حي ، محترم ، غير مدان ويترك السلطة طواعية لمن يخلفه بإنتخابات حقيقية ..
حلم بإن الحكام يجب أن تخشي الشعوب ..مش حكام تطلع تكشم لنا !
حلم بأني مش مضطر افضل اتفرج علي سلطة تفضل تحكمنا وتقطع نفسنا لحد لما تجيب درفها !
حلم بأني مش مضطر اعمل ثورة ! واعمل ليه وانا عندي آلية للتغيير السلمي ، الرقابة ،المسائلة والتطوير ..
حلم بأن احسن ولادها يديروا أحوالها ...نجيب احسن عيالها ..عيال مكملة تعليمها ...تعرف تجاوب علي اسئلة السياسة والاقتصاد ..ومنبقاش حكم ناس جاهلة بس مثبتانا !
اه هو حلم ولسه متحققش ...ويمكن قلب لواقع كابوس ..بس هيفضل الحلم حلو ...وتحقيقه حلم ..والسعي من أجله فرض عشان اولادنا ..
مش كل الاحلام اتحققت بثورة احيانا بضغط ووعي وتفاوض واحيانا كان لازم ثورة وده مش بيبقي سيناريو مكتوب لكن ده بيسوقه القدر، الناس وحجم الغضب والفشل الذي تصنعه السلطة التي لم تترك باب للتحسين / التطوير..
يمكن الحلم ميقدرش يتجسد في منتج جميل زيه ..يمكن ..بس يمكن كان محتاج وقت عشان الناس تتعلم أن الحلم الجميل محتاج ادوات تحوله من اعتراض وغضب الي قدرة حكم ، كفاءة وعقل ...يمكن كان لازم الناس تتعلم ..
هتفضل يناير حلم جميل بالنسبة لي ...حتي لو مزعلة حضرتك ..بس انا من حقي احلم بتحقيق أهدافها ..
من حقي احلم أننا نعيش في بلدنا محترمين ، أقوياء ، آمنين ،متعلمين ومحدش يعاملنا علي أننا رعية ولا ضيوف دمهم تقيل ..
همسع الأغنية النهاردة كتير ..وهحلم أننا في يوم نحقق احلام ناس كتير ضحت بكل ما تملك عشان غيرهم يعيش .
هقرأ الفاتحة كتير لابطال كتير خرجت عشان غيرها يعيش ...عشان مجرد حلم ...
هقرأ ،هسمع ، هتعلم واحلم .....حتي لو ده مزعل حضرتك . ..
حتي لو قررت تشيلها واقع بذيء بنعيشه ومزعل حضرتك .
الفاتحة لناس كتير احسن مني ...بكتير .
يمكن بسمع الأغنية ..يمكن بحنين ..حنين ...يمكن بدموع...بس برده بفخر ..احنا كنا هنا...وهنقدر في يوم .
يا بلادي ..يا بلادي ..انا بحبك يا بلادي
تعليقات
إرسال تعليق
أترك تعليق