احيانا تصدر قرارات اقتصادية يفتكسها مسئول صغير نص لبه.. لايملك بخمسة مليم معرفة بالاقتصاد.. مثل قرار فرض رسوم جمركية علي الهواتف الايفون القادمة مع المصريين من الخارج..ليه كده ياعم المسؤول؟
اولا: لو مصر عندها صناعة اجهزة محمول يبقي من حقنا نفرض رسوم وجمارك علي المستورد لحماية الصناعة الوطنية..لكن احنا زي ماحضرتك عارف: يامولاي كما خلقتني!
ثانيا: عندنا حوالي 20 مليون مصري يعملوا بالخارج يساهموا في نفقات اسرهم ورفع الاقتصاد المصري.. لو منهم نص مليون مصري بيجيبوا تليفونات وبيبعوهم ويكسبوا مش خسارة فيهم ولادنا واحسن ماتروح لجيب المستورد..خيرهم علينا ويستاهلوا كل خير!
ثالثا: القرار ده لصالح مين ؟
الاجابة : خدمة (ربما تكون مدفوعة الاجر) للباشا الوكيل المستورد اجهزة محمول من الصين وكوريا الجنوبية وموزمبيق !
يبقي مفروض عمنا المستورد نقول له : بدل ماتستورد نص مليون جهاز استورد مية الف جهاز كفايه،العملة الصعبة اللي ح تغرق لنا بيها السوق محاميل،استورد فول وعدس تركي..الناس تاكل عيش وحضرتك تتعشي وربنا يكرمك ويكرمنا معاك ياوالدي !
رابعا: قد يقول قائل : ان القرار صدر بخصوص الحجاج والمعتمرين القادمين من المملكة السعودية لان الاسعار تقل كثيرا عن بلادنا مما يستوجب الطلب من هذا الوكيل اعادة النظر في هامش ربحه كما ان هؤلاء القوم دافعين مبالغ طائلة لاداء الفريضة !
(معلومة تكاليف ورسوم الحج والعمرة في بلادنا اغلي من تكاليف الحج في كل بلاد العالم.. بريطانيا علي سبيل المثال!)
مش كتير علي الحاج يجيب تليفون ايفون هديه لابنه ولابنته وبلاش نيجي في الهايفه ونتصدر !
خامسا: افترض مصريين الخارج رد علي الاستفزاز قاموا بالاحتفاظ بمدخراتهم ببنوك الخارج..حولوا مصاريف اهلهم بالعملة المحلية..ماذا سيفعل ننوسة عين امه..اذكي اخواته مع مثل هذا التصرف المدمر للاقتصاد الوطني ؟
اقول قولي هذا وليس لي مصلحة مع هذا او ذاك فلا املك سوي تليفون عادي لا انتوي تبديله.. ماركة اللي يحب النبي يديله زقه اشتريته من صبحية جواز الملكه حتشبسوت من اخوها الملك الصغير !
تعليقات
إرسال تعليق
أترك تعليق